Yr adran yma

Beth os oes anghytuno parhaol gyda’r rhiant arall?

Pan fydd rhieni plentyn yn anghytuno am rywbeth, gall wneud bywyd yn llawer anoddach i bawb - ac yn enwedig i'r plentyn.

Mae'n gyffredin iawn i rieni sydd newydd wahanu neu sy'n byw ar wahân i ddadlau. Er mwyn rhoi amgylchedd diogel emosiynol i'ch plentyn mae'n bwysig delio ag achosion y dadlau cyn gynted â phosib, heb y plentyn. Rhesymau cyffredin dros ddadlau yw:

  1. Amser gyda'ch plentyn
  2. Arian a chynhaliaeth plant
  3. Dulliau magu plant a gwneud penderfyniadau

Amser gyda'ch plentyn

Fel arfer, bydd rhieni eisiau treulio cymaint o amser â phosib gyda'u plentyn ac mae’n annhebygol y byddwch chi eich dau'n wahanol i hyn. Mae gan eich plentyn yr hawl i dreulio amser gyda'i ddau riant pan fo'n ddiogel gwneud hynny.

Weithiau, pan fydd rhieni yn dadlau byddant yn ceisio defnyddio amser fel teclyn bargeinio, gan fygwth ei dynnu'n ôl os nad yw eu hanghenion yn cael eu cwrdd. Mae hyn yn niweidiol i emosiynau eich plentyn. Pan fo'n ddiogel gwneud hynny, mae gan eich plentyn yr hawl i dreulio amser gyda'i ddau riant. Rhaid i chi ddatrys eich gwahaniaethau cyn y gallwch wneud trefniadau hyblyg sy'n rhoi blaenoriaeth i'ch plentyn.

Arian a chynhaliaeth plant

Dyma fater arall all greu dadlau rhwng rhieni sydd wedi gwahanu. Fel rhieni mae'n rhaid i chi gynnal costau byw dyddiol eich plant yn ariannol ond gall fod yn anodd cytuno ar drefniadau cynhaliaeth plant os ydych yn gwrthdaro am rywbeth arall. Byddwch angen gwneud trefniadau ar gyfer cynhaliaeth plant, sef y swm a phryd i'w dalu.

Am y rheswm hwn, dylech wahanu cynhaliaeth plant a chyswllt plant oddi wrth unrhyw faterion emosiynol sydd gennych chi a'r rhiant arall. Os bydd anghytundebau eraill yn eich rhwystro chi rhag rhoi trefniadau cynhaliaeth ar waith yna mae'n bwysig eich bod yn cydnabod hyn ac yna'n delio gyda’r materion hyn ar wahân.

Dulliau magu plant a gwneud penderfyniadau

Wrth wneud penderfyniadau, gall barn un rhiant fod yn gwbl groes i'r rhiant arall, ac weithiau gall hyn greu gwrthdaro.

Os nad oes gennych bryderon difrifol am sut mae'ch plentyn yn cael ei fagu, ceisiwch osgoi gwrthdaro trwy gytuno ar safonau a thrafod eich pryderon gyda'r rhiant arall.